Forum członków i sympatyków towarzystwa Pro Loquela Silesiana

Ojgyn z Pnioków · Wysłany: 2009-06-28, 08:33 **Naszo godka ...**

Terôzki idzie we internecu nojść mocka roztomajtych zajtów, kaj gorzij abo lepszij (wdycki gorzij) ludzie tuplikujóm naszô gôdka, szkryflajóm po naszymu i take tam mecyje. I fórt krajzuje wic (we roztomajtych zortach), kiery tak na isto wypokopiół jesce za staryj Polski Karlik ze Kocyndra. Jô to po mojimu napisôł ale wic jes na isto festelnie stary:
Co Pónbóczek robiół bez siedym dni, miarkujymy jesce ze katyjmusu. Nó ale łósmego dnioszka Pónbóczek łozdowôł wszyjskim norodóm na Ziymi jynzyki i dijalykty. Wszyjskim tela, co ino dlô Ślózoków ... niy stykło.
Ślónzôki wziyni sie do kupy i poswali do Pónbóczka delegacyjô coby sprawiół i wyglajchowôł swój fyjler.
Kiej ino Pónbóczek ujzdrzôł tych naszych ślónskich karlusów festelnie sie zgańbiół. Zatym ździebko pomedikowôł i na doczkaniu pedziół ku tym naszym chopcóm:
– Jezderkusie! Chopy, niy gorszcie sie na mie i wyboczcie mie starymu. To wszyjsko bez tyn pieróński bajzel ze Lucyperym, kiery mi sam we wszyjskim szteruje. Tóż ja, łod dzisiôj bydziecie terôzki gôdać gynał tak jak ... JO !